Шрифт

Каноны Октоиха всем святым

Канон всем святым, от века Богу благоугодившим, глас 6.

Тропарь, глас 2:

Апо́столи, му́ченицы и проро́цы, святи́телие, преподо́бнии и пра́веднии, до́бре по́двиг соверши́вшии и веру соблю́дшии, дерзнове́ние иму́ще ко Спа́су, о нас Того́, я́ко Бла́га, моли́те спасти́ся, мо́лимся, душа́м на́шим.

Кано́н святы́м му́чеником, и святи́телем, и преподо́бным: творе́ние Ио́сифово, гла́с 6:

Пе́снь 1

Ирмо́с: Чу́вственный фарао́н потопле́н бы́сть со всево́инством, Изра́иль же проше́д посреде́ мо́ря, вопия́ше: Го́сподеви Бо́гу на́шему пои́м, я́ко просла́вися.

Припев: Вси святии, молите Бога о нас.

Све́тлым умо́м те́мныя освети́вше, злочести́выя же мучи́тели му́ченицы посрами́вше, победоно́сцы бы́ша я́ве, и к невече́рнему све́ту преидо́ша.

Святи́телие Христо́вы, и преподо́бных ли́к, и проро́к, и пра́ведных все́х еди́нственное торжество́, доброде́тельными красота́ми блиста́ющеся, внидо́ша к небе́сным селе́нием.

Слава: Же́н вся́ко мно́жество присво́ившеся Христо́ви, Е́ву лю́тым прельще́нием умори́вшаго попра́ша труды́ му́жескими, ублажа́ются Боже́ственными пе́сньми.

И ныне, Богородичен: Свяще́ннейши, Чи́стая, херуви́м, и серафи́м, яви́лася еси́ ро́ждши творца́ тва́ри. Его́же непреста́нно моли́, уще́дрити рабы́ Твоя́ Тебе́ сла́вящыя.

Пе́снь 3

Ирмо́с: На тве́рдем ве́ры Твоея́ ка́мени помышле́ние утверди́в души́ моея́, утверди́, Го́споди: Тя́ бо и́мам бла́же, прибе́жище и утвержде́ние.

Теле́сным примеси́вшеся боле́знем страда́льцы, на неболе́зненное взира́ху воздая́ние ра́дующеся: и ны́не утоля́ет на́шя боле́зни мно́гия благода́тию.

Ра́зумом тве́рдым отгоня́юще зве́ри лука́выя, Боже́ственнии святи́телие, изба́виша неврежде́нны от зло́б те́х, Христо́ва Боже́ственная воспита́ния.

Слава: Во́лею и́гу Госпо́дню подвозше́дый ли́к преподо́бных, умертви́в мудрова́ние плотско́е, и живо́т ве́чный восприя́т.

И ныне, Богородичен: Я́же Христа́ возлюби́вшыя жены́, Тебе́ Того́ неизрече́нно ро́ждшую, Всесвята́я Влады́чице, ра́достною мы́слию обстоя́ще ликовству́ют.

Седален, глас 6.

Го́споди, святы́х Твои́х па́мять дне́сь показа́ся, я́ко ра́й, и́же во Eде́ме, в не́й бо ра́дуется вся́ тва́рь: и подае́ши на́м те́х мольба́ми ми́р и ве́лию ми́лость.

Сла́ва, и ны́не, Богоро́дичен: От се́рдца воздыха́ния и от утро́бы приношу́ Ти. Твое́, Всенепоро́чная, молю́ благопремени́тельное заступле́ние: поми́луй всестра́стную мою́ ду́шу, умоли́ многоми́лостиваго Бо́га изба́вити мя́ суда́, и е́зера о́гненнаго, Еди́на Благослове́нная.

Пе́снь 4

Ирмо́с: Услы́шах слу́х Тво́й, и убоя́хся, разуме́х дела́ Твоя́, и ужасо́хся: сла́ва си́ле Твое́й, Го́споди.

Стоя́ще зря́ху го́рдаго страстоте́рпцы, пред нога́ми и́х попира́ема: и вся́ческих Зижди́теля благода́рственно сла́вляху.

Глаго́л светлостьми́ святи́телие вооружи́вшеся, к све́ту разуме́ния, челове́ки от тьмы́ ересе́й спасо́ша.

Слава: Я́ко у́глие яви́шася, к Бо́гу те́плым разуме́нием, и стра́сти попали́вше веще́ственныя преподо́бнии, вельми́ прославля́ются.

И ныне, Богородичен: Госпо́дь, Пречи́стая, из Тебе́ неизрече́нно в пло́ть облеки́йся, же́н сосло́вие му́жественне подвиза́вшихся прия́т.

Пе́снь 5

Ирмо́с: Све́т возсия́вый ми́ру, Христе́, просвети́ се́рдце мое́ от но́щи Тебе́ зову́ща, и спаси́ мя.

Истка́ную от вы́шния благода́ти, обле́кшеся во оде́жду, страда́льцы, врага́ обнажи́сте.

Со святы́ми проро́ки почти́м первосвяще́нники богому́дрыя, и преподо́бныя Бо́гу благоугоди́вшыя.

Слава: Во псалме́х и пе́снех восхва́лим же́н сосло́вие: я́ко Бо́гу до́бре угоди́вшыя.

И ныне, Богородичен: Избавля́ющи на́с вся́каго вра́жия вре́да, яви́лася еси́ влады́чице, моля́щи Христа́ еди́наго благоутро́бнаго.

Пе́снь 6

Ирмо́с: Ки́том пожре́н грехо́вным, вопию́ Тебе́, Христе́: я́ко проро́ка из истле́ния мя́ свободи́.

Крове́й Боже́ственных тече́нием мы́сленныя враги́ погрузи́сте: ве́рных же сердца́ страстоте́рпцы напои́сте.

Распе́нше себе́ ми́ру и страсте́м, преподо́бнии, и прему́дрии святи́телие, Боже́ственныя Сла́вы сподо́бистеся.

Слава: Проро́ков ли́к, и честны́х же́н собо́р, до́бре подвиза́вшихся по до́лгу ублажа́ем.

И ныне, Богородичен: Пло́тию роди́вшая Христа́, пло́ти моея́ стра́сти умертви́, и оживи́, Де́во, ду́шу мою́ хода́тайством Твои́м.

Кондак, глас 8:

Я́ко нача́тки естества́ Насади́телю тва́ри, вселе́нная прино́сит Ти, Го́споди, богоно́сныя му́ченики: тех моли́твами в ми́ре глубо́це, Це́рковь Твою́, жи́тельство Твое́, Богоро́дицею соблюди́, Многоми́лостиве.

Икос:

И́же по всей земли́ му́чившиися, и на Небеса́ пресели́вшиися, и́же стра́сти Христо́вы подража́вшии, и стра́сти на́ша отье́млющии, зде днесь собира́ются, перворожде́нных показу́юще Це́рковь, я́ко го́рния о́браз содержа́щу, и Христу́ вопию́щу: Бог мой еси́ Ты, Богоро́дицею соблюди́ мя, Многоми́лостиве.

Пе́снь 7

Ирмо́с: Преподо́бных Твои́х отроко́в пе́снь услы́шавый и пе́щь горя́щую ороси́вый, благослове́н еси́ Го́споди Бо́же оте́ц на́ших.

Христо́вы страстоте́рпцы, угаси́вшыя пла́мень лю́таго безбо́жия ту́чами крове́й, пе́сньми почти́м.

Благосла́внии иера́рси, зи́му ересе́й разруши́вше, и к весне́ Боже́ственней ра́дующеся приидо́ша.

Слава: Терпе́нием бога́тую ду́ха благода́ть насле́довасте по́стницы, и мно́жество бесо́в погуби́сте.

И ныне, Богородичен: И́же тебе́ Де́ву показа́вый, Чи́стая, и по рождестве́, святы́х же́н ли́ки Тебе́ насле́довавшыя спа́сл е́сть.

Пе́снь 8

Ирмо́с: Преподо́бнии Твои́ о́троцы в пещи́ херуви́мы подража́ху, трисвяту́ю пе́снь воспева́юще, благослови́те, по́йте, и превозноси́те во вся́ ве́ки.

До́блественне муче́ний треволне́нием ураня́еми, Боже́ственнии му́ченицы, благода́тию проше́дше в тишину́ глубо́кую, вы́шняго Ца́рствия достиго́ша.

Преподо́бнии, всему́дрии святи́телие, просия́вше я́ко со́лнце, просвеща́ют вселе́нную уче́ний луча́ми, и исцеле́ний светлостьми́.

Слава: Сла́внии проро́цы, и первосвяще́нницы, преподо́бнии вси́, и пра́веднии, му́ченик мно́жества, и же́н, ста́до ва́ше все́ сохрани́те от бесо́в непоколеби́мо.

И ныне, Богородичен: Всю́ Тя бли́жнюю добро́ту Бо́га, Де́во, ли́к же́нский возлюби́, и во сле́д Тебе́ приведо́шася Влады́це все́х, согла́сно блажа́ще Тя́, Пречи́стая.

Пе́снь 9

Ирмо́с: Е́же ра́дуйся, от А́нгела прии́мшая, и ро́ждшая созда́теля Твоего́, Де́во, спаси́ Тя велича́ющыя.

Овча́та чи́стая приведо́стеся ко Влады́це страстоте́рпцы му́ченицы, того́ моли́те спасти́ ду́шы на́шя.

Я́ко па́стырие на зла́це благоче́стия святи́телие, ве́рныя упасо́сте, и ны́не во огра́ду Боже́ственную всели́стеся.

Слава: Со святы́ми святи́тели, и проро́ки, и со жена́ми кре́пко пострада́вшими, и преподо́бных ли́ки да ублажи́м.

И ныне, Богородичен: Све́т ро́ждшая Де́во, просвети́ ду́шу мою́, тьму́ отгоня́ющи греха́ и ле́ности моея́.

Молитва

О преблаженнии угодницы Божии, вси святии, предстоящии Престолу Пресвятыя Троицы и наслаждающиися неизреченнаго блаженства! Се ныне, в день общаго вашего торжества, милостивно призрите на нас, меньших братий ваших, приносящих вам сие хвалебное пение и ходатайством вашим просящих милости и отпущения грехов у Преблагаго Господа: вемы бо, воистинну вемы, яко вся, елика восхощете, испросити у Него можете. Темже убо смиренно молимся вам: молите милостиваго Владыку, да подаст нам дух вашея ревности к хранению святых Его заповедей, яко да текше по стопам вашим, возможем земное поприще в добродетельном житии без порока прейти и в покаянии достигнути преславных селений райских, и тамо купно с вами прославляти Отца и Сына и Святаго Духа, во веки веков. Аминь.

Каноны Всем святым